Gedachtenissen: Langs de deur
In de Moespot uutgave 2023/280 von ik een gedicht van Dick Dalhuizen in 't dialect van Heerde/Waopmvelde. De Moespot is 'n uutgave van de nedersaksische dialectkringen, o.a. Vrienden van de streektaal Lochem en umgeving. Het gedicht von ik zo mooi bie disse tied passen, da'k 't in 't Vierakkers umme ezet hebbe, al is 't verschil niet erg groot. ’t Gedicht heet Gedachtenissen.
Wim Regelink van ’t Schoolmeister
Gedachtenissen
Zittend vanuut 'n luie stoel achter plestik geraniums
Want in een ding was ik de tied veuruut, al was 't mor
dat ze gin water neudig hebt.
Achter geslotten oog'n dreum ik in de tied trugge en zit ik mien laeven te aoverdenken.
De tied van toen en noe, wat een wereld van verschil
De tied van toen kump nooit trugge.
Maor saemenhoorigheid ston baovenan.
Ik mos denken an de bakker, de melkboer en de slager.
Ze kwammen gewoon langs de deure.
De bakker kwam brood brengn een halven of een helen in de mande
alles zonder verpakking.
De melkboer kwam langs en mien moo ging met een pänneken naor um too
veur 'n liter melk, yoghurt en vla zatt’n in 'n flesse met statiegeld.
De schellenboer kwam ok langes.
hé halen de schellen en aover ebleven etten op.
't Is een grunen riejende kliko.
Gin verwerking is neudeg de beeste atten 't gewoon op.
Mor d'r kwammen wieze mensen dé daor anders over dachn.
Boodschappn an de deure brengn, mensen dé dat deén kossn geld.
Verget 't mor, ze hadden béttere plannen, komp zelf mor naor de winkel.
Brood gonk in plastik zékke, vla en yoghurt in katon
met an de binnenkante plestik, an 't miljeu wodden neet edach
wieze heren hebt dit op ons pad ebrach.
Noe mot andren 't paedjen mor schone vaegen
met de hoppe dat 't niet te laate is.
Dan wod ik wakker uut de dreum,
Zit waer met de gedachten in disse tied.
D'r zal wat motten gebeurn umme 't miljeu te spaorn.
Ik heb mien plastik geraniums netjes laoten verwarkn
um ’n biedrage te levern.
Dan zie'k daor een auto van de supermarkt langs riejn
um de mensen boodschappen an huus te brengn.
Nieje gedacht’n komt baoven drievn.
Waern de mensen van toen hun tied veuruut
of mot wiele noe trugge in de tied?
Soms wet ik 't niet meer
Dan trek ik mie in gedachtn trugge naor de olde tied met de geachtenis:
Vrogger is een mooie schuulplaatse.
----
Directoire eleastiek
Mien vrouw mos laats 't elastiek in een trainingsbokse van één van de kleindochters vervangen, toen ik op 't kaatje kekke ston daor op directoire elastiek. Ik mosse lachen en vroog heet dat nog zo? “Opa wat is dat”, vrogen de kleinkinder. Nou directoire is een mooi woord veur onderbokse, dus elastiek veur de onderbokse. Mien moeder had vrogger de kaste d'r vol met liggen net as klöskes gaorn, luie wieve kneupe, jappelschelmeskes en ander grei. Zo nao de oorlog kwam d'r völle volk langs de deure zukke nagotie vekopen. Meespat met ettenstied dan konnen ze een bord met etten. At 't mooi waer was buten, anders binnen niet te kot bie ons vanwège eventueel ongedierte zoat ze zei.
Ok de bakker kwam an, zelfs twee, de kruidenier tevens bakker en mensen met klere. Mien moeder was op Zutphen ericht, ze ging dan naor de stad. Nao de oorlog wodden völle Zutphense leveranciers nog wel an ehollen want ie wet nooit hoe 't geet, maor in de vieftige jaoren wodden dit toch langzamer hand afebouwd. Wie hebt nog wel een helen tied jappels naor Zutphen ebracht, mor in de jaoren zestig ging dit ok langzaam over. Toen kwam d'r een tiet da'w alles mossen halen en noe komt ze de boodschapp'n waer brengen a'j dat wilt en a'j 't on-line bestelt ok nog directoire elastiek. Ik gleuve dat ik mien mor terugge trekke in gedachtenissen nao de olde tied en denke vrogger kump niet waer mor ze waren ok zo gek nog niet....
Wim van 't Schoolmeister